પૂછશો મા, કોઈ પૂછશો મા,
મારા હૈયાની વાતડી પૂછશો મા.
દિલના દરિયાવ મહીં કાંઈ કાંઈ મોતી:
ગોતી ગોતીને તેને ચૂંથશો મા:
મારા હૈયાની વાતડી પૂછશો મા.
ટહુકે છે કોકિલા, પુકારે છે બપૈયો:
કારણોના કામીને સૂઝશો મા:
મારા હૈયાની વાતડી પૂછશો મા.
આંસુનાં નીરના કો આશાના અક્ષરો
આછા-આછા તો યે લૂછશો મા:
મારા હૈયાની વાતડી પૂછશો મા.
જગના જોદ્ધા! એક આટલું સુણી જજો:
પ્રારબ્ધનાં પૂર સામે ઝૂઝશો મા:
મારા હૈયાની વાતડી પૂછશો મા.
-મહાકવિ નાનાલાલ
No comments:
Post a Comment