સીધું સાદું સરળ જીવન છે એને કાં ભાઈ ટ્વિસ્ટ બનાવો ?
નથી,નથી ની વાતો છોડો, છે,છે,છે નું લિસ્ટ બનાવો
કડવા ઘૂંટ ઉતાર્યા કરતાં એક વખત બસ થૂંકી નાંખો
અંધારાને તો અબઘડિએ ભરી ચલમમાં ફૂંકી નાંખો
દસે દિશે પ્રગટાવો સૂરજ, દશે દિશાને ઈસ્ટ બનાવો
નથી,નથી ની વાતો છોડો, છે,છે,છે નું લિસ્ટ બનાવો
લાચારી અંજળ ડ્હોળે ને એ પહેલા જ ઉલેચી નાંખો
માંડ આછર્યો છે આ વીરડો ખોબે ખોબે વ્હેચી નાંખો
છાતી કાઢી સુખ દુખ ઉજવો પળપળને ગર્વિષ્ઠ બનાવો
નથી,નથી ની વાતો છોડો, છે,છે,છે નું લિસ્ટ બનાવો
ક્ષણને સાચવતા જે શીખ્યા છેવટ એ તો સદી થયા છે
કાળમીંઢ પથ્થરને તોડી સતત વહ્યાં તે નદી થયા છે
હાર જીતને તડકે મૂકી પ્રયાસને સંનિષ્ઠ બનાવો
નથી,નથી ની વાતો છોડો,છે,છે,છે નું લિસ્ટ બનાવો
કૃષ્ણ દવે