કાનો નીજ આંગનમાં.....
નેહ નીતરતી પાંપણ ઢાળી શોધે વૃંદાવનમાં
રાધા શોધે કાન્હાને ને કા'નો નૈ મધુવનમાં
કાનો નીજ આંગનમાં....
ગોકુલ, મથુરા, વૃંદાવનમાં ગલીએ ગલીએ જોયું
વનરાવનમાં વનરાજીની શાખે શાખે જોયું
પગલે પગલે થઇ બ્હાવરી પૂછે છે ઉપવનમાં......
કાનો નીજ આંગનમાં....
ભરનીંદરમાં ઝબકી જાગી અને હીંચકે બેઠી
શામળિયાની છબી અચાનક મધરાતે કાં પેઠી ?
શ્યામ મિલનની લગની લાગી મઘમઘતા આ વનમાં .......
કાનો નીજ આંગનમાં....
પરોઢ થાતાં પરસાળે જઈ આસ ભરીને જોતી
વાંસલડીના સૂર ધીમેથી મનમાં મીઠાં પ્રોતી
શ્વાસ સામટા ફરી વળ્યા કાંઈ મખમલિયા સ્પંદનમાં.....
કાનો નીજ આંગનમાં....
--- હર્ષિદા દીપક
