તમે કહું કે તું

તમે કહું કે તું.?

રોજ વિચારુ હું, 

એ જ મીઠી મુઝવણમાં મારો દિવસ ગુજારુ હું,

ઘડીક તમે બહું વહાલા લાગો, 

લાગો અનહદ પ્યારા,

ઘડિક તમે બહું મીઠ્ઠા લાગો  ઘડિક સાવ જ ખારા

ખબર નહિ આ હૈયુ મારુ તમને સમજે શું...

તમે કહું કે તું ?

તુ કહું તો બહું નાના લાગો તમે કહુ તો મોટા

સંબોધનના શબ્દોમાં છે બે જ શબ્દનો કોટા

ક્યાંક એ બન્ને કાંટા જેવા,ક્યાક એ બન્ને રૂ

તમે કહું કે તુ.?

સંબોધનમા શુ રાખ્યુ છે જ્યા હો સાચો પ્રેમ 

છતાં તમોને સારુ લાગે

કહેજો અમને એમ,

તમે કરો સંબોધન ગમતુ 

સહમત હું તો  છું

તમે કહો કે તું?

 -અંજનાસ્વામી અંજુમ આનંદ

હરિ મારી આંખ્યુંમાં કરજો વિસામો,

 હરિ મારી આંખ્યુંમાં કરજો વિસામો,

પાંપણની પોટલીમાં આંસુનાં તાંદુલ લઈ

ઉભો હું થઈને સુદામો,

હરિ મારી આંખ્યુંમાં..

દરિયાની ભરતીમાં મોજાનો લોડ

એમ ઉછળવું કાયામાં રગોનું;

પાંસળીની પાર પીડા એટલી સમાઈ છે

જેટલું દ્વારીકામાં સોનું,

જરા ધસમસતા શ્વાસોને થામો.

મારી આંખ્યુંમાં કરજો વિસામો.

કીકીઓનાં કુંજામાં સપનાની કાંકરીઓ

નાખે જળધાર એક સીંચી;

કે ધારને કિનારે હરિ હસતા દેખાય

પછી હળવી આંખ લઉં મીંચી.

હવે જળનો કિનારો છે સામો,

મારી આંખ્યુંમાં કરજો વિસામો.

રમેશ પારેખ

રીંગ ટોન

 કાનજીના મોબાઈલમાં જ્યારે અચાનક રીંગટોન રાધાનો વાગે,

જન્મો જનમની ઘેલી રાધાની પ્રીત કાનજીની આંખોમાં જાગે.

મોબાઈલના નેટવર્કમાં કેમે ના સંભળાતી રાધાના રાસની તાલી,
મોબાઈલ પકડીને થાકેલા હાથને રાધાનો હાથ લેવો ઝાલી;
આયખાની સાંજ પર ઊભેલો કાનજી, સપનાનો ટૉક ટાઈમ માંગે.

s.m.s. મોકલેલો વાયા ઓધાજી, એના replyમાં રાધાના આંસુ,
રાધાના આંસુનો s.m.s. વાંચીને, કાનજીની આંખે ચોમાસું ;
મોબાઈલની બેટરીને ખાલીપો વળગે ત્યાં,વાંસળી વાગે છે એક રાગે.

– અંકિત ત્રિવેદી