હરિ મારી આંખ્યુંમાં કરજો વિસામો,

 હરિ મારી આંખ્યુંમાં કરજો વિસામો,

પાંપણની પોટલીમાં આંસુનાં તાંદુલ લઈ

ઉભો હું થઈને સુદામો,

હરિ મારી આંખ્યુંમાં..

દરિયાની ભરતીમાં મોજાનો લોડ

એમ ઉછળવું કાયામાં રગોનું;

પાંસળીની પાર પીડા એટલી સમાઈ છે

જેટલું દ્વારીકામાં સોનું,

જરા ધસમસતા શ્વાસોને થામો.

મારી આંખ્યુંમાં કરજો વિસામો.

કીકીઓનાં કુંજામાં સપનાની કાંકરીઓ

નાખે જળધાર એક સીંચી;

કે ધારને કિનારે હરિ હસતા દેખાય

પછી હળવી આંખ લઉં મીંચી.

હવે જળનો કિનારો છે સામો,

મારી આંખ્યુંમાં કરજો વિસામો.

રમેશ પારેખ