કાવ્યતૃષા

હરિવર, તમને હાથવગા હું રાખું..
વારેવારે ક્યાં જઇ ગોતું ? ગૂંજામાં હું રાખુ..
હરિવર, તમને હાથવગા હું રાખું..

ઘડીક રેઢા મેલું તો તો છટકી જશો વા'લા !
ઝુરાપામાં રોઈ રોઈને શીદને મરીએ ઠાલાં !
ચાહું ત્યારે ચગળું તમને, ચાહું ત્યારે ચાખું..
હરિવર, તમને હાથવગા હું રાખું..

અત્તરનું પોતું થઇ વા'લા મધમધ વાતું કરજો...!
આંખ્યુંની ઓસરીએ વા'લા થીર થઇને ઠરજો..
અંતરની એકાંત્યે મારા ભીતરની હું ભાખું...
હરિવર, તમને હાથવગા હું રાખું...