આંગણું બડબડ્યું ડેલી બોલી પડી ભીંત મૂંગી રહી
ઘર વિશે અવનવી વાત સહુએ કરી ભીંત મૂંગી રહી
આભમાં ઊડતી બારીઓ પથ્થરે કાં જડાઈ ગઈ?
વાત એ પૂછનારેય પૂછી ઘણી ભીંત મૂંગી રહી
‘આવજો કહેવું શું પથ્થરોને ?’ ગણી કોઈએ ના કહ્યું
આંખ માંડી જનારાને જોતી રહી ભીંત મૂંગી રહી
ઘર તજી કોઈ ચાલ્યું ગયું એ પછી બારીએ બેસીને
માથું ઢાળી હવા આખી રાત રડી ભીંત મૂંગી રહી
કાળના ભેજમાં ઓગળી ઓગળી એ ખવાતી રહી
કોઈએ એ વિષે કો'દિ પૂછ્યું નહીં ભીંત મૂંગી રહી
-મનોજ ખંડેરિયા
No comments:
Post a Comment