કાવ્યતૃષા

વરસું તો હું ભાદરવો  ને  સળગું તો વૈશાખ;

મારી પાસે બે જ વિકલ્પો, કાં આંસુ કાં રાખ.




ઘેરાઉં તો વાદળ કાળા,  વિખરાઉં  તો વ્હાલ

બીડાઉં  તો સ્વપ્ન સલુણું, ઊઘડું તો હું આશ

ભિંજાઉં તો શ્રાવણ છલબલ, કોરું તો દુષ્કાળ

વરસું તો હું ભાદરવો...             
મારી પાસે બે જ વિકલ્પો, કાં આંસુ કાં રાખ.



ફોરું તો હું  ફૂલ અને  જો  બટકું તો હું ડાળ
ચાલું તો હું પંથ અને  ભટકું તો અંતરિયાળ

વરસું તો હું ભાદરવો  ને  સળગું તો વૈશાખ;
ઊડું તો આકાશ,  નહિ ઊડું તો ઘાયલ શ્વાસ
મારી પાસે બે જ વિકલ્પો, કાં આંસુ કાં રાખ.

વરસું તો હું ભાદરવો...     
મારી પાસે બે જ વિકલ્પો, કાં આંસુ કાં રાખ.

    - ભગવતીકુમાર શર્મા