કાવ્યતૃષા

સાત સૂરોનાં સરનામે અમે તમને મળવા આવ્યાં,

સૂર શબદનાં સથવારે બે વાત મઝાની લાવ્યાં.

તમને કહું છું કે ખિસ્સામાંથી સાંજ મઝાની કાઢો,

ગમતા જણની, ગમતી ક્ષણની વાત મઝાની માંડો,

યાદ અને સપનાની વચ્ચે ટહુકો થઈને જામ્યાં,

સૂર શબદનાં સથવારે બે વાત મઝાની લાવ્યાં,

સાત સૂરોનાં..

ગીત ગઝલમાં ગગન ઉમેરી ઊડવાનું છે મન,

સાથ તમારો મળે સૂરીલો, રસભર છે જીવન,

રોમ-રોમમાં જે અજવાળે એ દિવડાં પ્રગટાવ્યાં,

સૂર શબદનાં સથવારે બે વાત મઝાની લાવ્યાં,

સાત સૂરોનાં..

સાત સૂરોનાં સરનામે અમે તમને મળવા આવ્યાં,

સૂર શબદનાં સથવારે બે વાત મઝાની લાવ્યાં.

 – અંકિત ત્રિવેદી