કાવ્યતૃષા

મને સુક્કા કદંબનું તે પાંદડું કહે

મને ગોકુળ કહે તો તને મારા સોગંદ,

મને મોરલી કહે કે મોર પીછું કહે

મને માધવ કહે તો તને મારા સાગંદ.

કેમ કરી આંસુને ઓળખશે ભાઈ?

હું તો પાણીમાં તરફડતી માછલી.

જીવતરની વારતામાં ગૂંથેલી ઘટના તો

ખાલીખમ શ્રીફળની કાચલી.

જીવ સોંસરવી ઘૂઘવતી વેદનાને અમથુંયે

દરિયો કહે તો તને મારા સોગંદ.

વેણુંમાં ફરફરતા આદમ ને ઇવ

જાણે સૂક્કેલા પાંદડાની જાળી,

ચપટી વગાડતાંમાં ઊડી ગઇ ક્યાંક

મારા ભેરુબંધોની હાથતાળી.

મને ડૂમો કહે કે ભીનું ડૂસકું કહે

મને માણસ કહે તો તને મારા સોગંદ.

 – હરીશ મિનાશ્રુ