એકવાર આંખોમાં આવ્યું તું પૂર

એકવાર આંખોમાં આવ્યું તું પૂર

ભેળાં રમે'લ એવા, 

અંતરની ગાંઠ જેવા 

કાનજી જતા'તા દૂર દૂર.

ભીની આ પાંપણોને, 

ભીનાં હૈયાં ને કંઈ 

ભીના એ વાંસળીના સુર

એકવાર આંખોમાં આવ્યું તું પૂર

મૂંગી એ  વેદનાંને, 

મૂંગા એ વાયદાને 

મૌનમાં એ પડઘા પ્રચુર

એકવાર આંખોમાં આવ્યું તું પૂર

સુની આ આયખાની 

ખાલીખમ્મ શેરીઓમાં 

બાઝે કંઈ રણઝણ નૂપુર,

ખાલી વૃંદાવનની વાટ જેવી આંખોમાં પ્રગટે કૈં દર્શનનાં નૂર

એકવાર આંખોમાં આવ્યું તું પૂર.

'શબ્દા'