ઝરણાંનું દે નામ અને ના આપે વહેવું !
આ તે કેવું ?
શબ્દો સાથે કામ ને પાછું મૂંગા રહેવું !
આ તે કેવું ?
રણની જેવું તરસી પડીએ તોય વહે તું અધ્ધર ?
ઝાકળ જેવું વરસી પડીએ તોય કહે તું પથ્થર ?
તું બોલે બેફામ ને મારે કંઈ ના કહેવું ?
આ તે કેવું ?
હોય વૃક્ષની જાત અને ના છાંયો આપે ?
છે અમાસની રાત અને પડછાયો આપે ?
માંગું ખુલ્લેઆમ ને તારે કંઈ ના દેવું ?
આ તે કેવું ?
મત્સ્ય હોઉં ને જળને કંઈ તરવાનું પૂછું ?
વાદળ છું તો વરસું, કંઈ સરનામું પૂછું ?
ભીંજે આખું ગામ ને કોરું એક જ નેવું !
આ તે કેવું ?
– કૃષ્ણ દવે
No comments:
Post a Comment