લ્યો, દીવાની આબરૂ જળવાઈ ગઈ,
દ્વાર પર આવી હવા ફંટાઈ ગઈ.
ફૂલની ફોરમ બધે ચર્ચાઈ ગઈ.
માવજત માળીની બસ વીસરાઈ ગઈ.
વાંસળીને કાજ ક્યાંથી લાવશું ?
ફૂંક તો ચૂલા ઉપર વપરાઈ ગઈ.
કોણ પડછાયા ઉપાડી જાય છે ?
એ જ જોવા સાંજ પણ રોકાઈ ગઈ.
સોયમાં દોરાને બદલે બા હતી,
ગોદડીમાં હૂંફ પણ સીવાઈ ગઈ.
મેં ગુમાવી એમ મારી મુગ્ધતા,
જેમ દરિયામાં નદી ખોવાઈ ગઈ.
તોપના મોઢે કબૂતર ચીતર્યું,
લાલ રંગોળી છતાં પુરાઈ ગઈ.
~ ગૌરાંગ ઠાકર
દીકરી તો પ્રેમધારા.....
પચરંગી ઓઢેલી ઓઢણીમાં લાડકડી હળવું એ હરખાતી જાય....
ઘમ્મરિયો ઘાઘરો ને બોલ તારા મીઠડાં મુખડેથી મલકાતી જાય..
કે દીકરી મારી...
કે દીકરી મારી આછેરું મલકાતી જાય.....
કોયલનો કંઠ ભીનો
મોરલાનો ટહુકો ઝીણો
આસોની અજવાળી
રાત્યુંનું તેજ ગણો
વહેલી પરોઢમાં ઉગમણે દ્વાર મારે અજવાળા અજવાળા થાય......
કે દીકરી મારી...
કે દીકરી મારી આછેરું મલકાતી જાય.....
મીઠડાં એ બોલ તારા
લાગે છે સૌને પ્યારા
ઝરણાની જેમ વહે
તારામાં પ્રેમધારા
જીવતરના ઓરડામાં પગલાંની છાપ તારી શુકનમાં પથરાતી જાય...
કે દીકરી મારી...
કે દીકરી મારી આછેરું મલકાતી જાય.....
હર્ષિદા દીપક
તમે કહું કે તું.?
રોજ વિચારુ હું,
એ જ મીઠી મુઝવણમાં મારો દિવસ ગુજારુ હું,
ઘડીક તમે બહું વહાલા લાગો,
લાગો અનહદ પ્યારા,
ઘડિક તમે બહું મીઠ્ઠા લાગો ઘડિક સાવ જ ખારા
ખબર નહિ આ હૈયુ મારુ તમને સમજે શું...
તમે કહું કે તું ?
તુ કહું તો બહું નાના લાગો તમે કહુ તો મોટા
સંબોધનના શબ્દોમાં છે બે જ શબ્દનો કોટા
ક્યાંક એ બન્ને કાંટા જેવા,ક્યાક એ બન્ને રૂ
તમે કહું કે તુ.?
સંબોધનમા શુ રાખ્યુ છે જ્યા હો સાચો પ્રેમ
છતાં તમોને સારુ લાગે
કહેજો અમને એમ,
તમે કરો સંબોધન ગમતુ
સહમત હું તો છું
તમે કહો કે તું?
-અંજનાસ્વામી અંજુમ આનંદ
હરિ મારી આંખ્યુંમાં કરજો વિસામો,
પાંપણની પોટલીમાં આંસુનાં તાંદુલ લઈ
ઉભો હું થઈને સુદામો,
હરિ મારી આંખ્યુંમાં..
દરિયાની ભરતીમાં મોજાનો લોડ
એમ ઉછળવું કાયામાં રગોનું;
પાંસળીની પાર પીડા એટલી સમાઈ છે
જેટલું દ્વારીકામાં સોનું,
જરા ધસમસતા શ્વાસોને થામો.
મારી આંખ્યુંમાં કરજો વિસામો.
કીકીઓનાં કુંજામાં સપનાની કાંકરીઓ
નાખે જળધાર એક સીંચી;
કે ધારને કિનારે હરિ હસતા દેખાય
પછી હળવી આંખ લઉં મીંચી.
હવે જળનો કિનારો છે સામો,
મારી આંખ્યુંમાં કરજો વિસામો.
રમેશ પારેખ
કાનજીના મોબાઈલમાં જ્યારે અચાનક રીંગટોન રાધાનો વાગે,
જન્મો જનમની ઘેલી રાધાની પ્રીત કાનજીની આંખોમાં જાગે.
મોબાઈલના નેટવર્કમાં કેમે ના સંભળાતી રાધાના રાસની તાલી,
મોબાઈલ પકડીને થાકેલા હાથને રાધાનો હાથ લેવો ઝાલી;
આયખાની સાંજ પર ઊભેલો કાનજી, સપનાનો ટૉક ટાઈમ માંગે.
s.m.s. મોકલેલો વાયા ઓધાજી, એના replyમાં રાધાના આંસુ,
રાધાના આંસુનો s.m.s. વાંચીને, કાનજીની આંખે ચોમાસું ;
મોબાઈલની બેટરીને ખાલીપો વળગે ત્યાં,વાંસળી વાગે છે એક રાગે.
– અંકિત ત્રિવેદી
ગોકુળથી સંદેશો આવ્યાનું જાણીને મથુરાએ ખોંખારા ખાધા,
કાગળ પર લખ્યું'તું કાનાને પહોંચે ને લિખિતંગમાં નામ હતું રાધા.
ગુલ્લાબી કાગળને ખોલીને જોયું તો બીડયો'તો કેવળ સન્નાટો
પટરાણી બોલ્યા કે ગર્વીલી રાધાને લઇ ગઇ છે હુશિયારી આંટો
જાણતલ તેડાવો કાગળ ઉકેલો ભૈ આપણે તો ભાષાના વાંધા
કાગળ પર લખ્યું'તું કાનાને પહોંચે ને લિખિતંગમાં નામ હતું રાધા.
માથું ધૂણાવીને ઓધવ વિચારે કે હું યે છું મૂરખનો જામ,
કાનાને સોંપી દઉં એની અમાનત, શું રખડાવું ઠેરઠેર આમ !
મૂછોમાં મલક્યા કે કોરાકટ કાગળનો શું રે જવાબ દઇશ માધા?
કાગળ પર લખ્યું'તું કાનાને પહોંચે ને લિખિતંગમાં નામ હતું રાધા.
હૈયે અડાડીને , રોકીને શ્વાસ પછી કાનાએ કાગળને ખોલ્યો,
આ બાજુ આંખે ન પૂછ્યો સવાલ અને એ બાજુ કાગળ ન બોલ્યો
આંખો લૂછીને હરિ હળવેથી બોલ્યા કે મારે તો રડવાની બાધા
કાગળ પર લખ્યું'તું કાનાને પહોંચે ને લિખિતંગમાં નામ હતું રાધા.
—પારુલ ખખ્ખર
