દીકરી તો પ્રેમધારા.....
પચરંગી ઓઢેલી ઓઢણીમાં લાડકડી હળવું એ હરખાતી જાય....
ઘમ્મરિયો ઘાઘરો ને બોલ તારા મીઠડાં મુખડેથી મલકાતી જાય..
કે દીકરી મારી...
કે દીકરી મારી આછેરું મલકાતી જાય.....
કોયલનો કંઠ ભીનો
મોરલાનો ટહુકો ઝીણો
આસોની અજવાળી
રાત્યુંનું તેજ ગણો
વહેલી પરોઢમાં ઉગમણે દ્વાર મારે અજવાળા અજવાળા થાય......
કે દીકરી મારી...
કે દીકરી મારી આછેરું મલકાતી જાય.....
મીઠડાં એ બોલ તારા
લાગે છે સૌને પ્યારા
ઝરણાની જેમ વહે
તારામાં પ્રેમધારા
જીવતરના ઓરડામાં પગલાંની છાપ તારી શુકનમાં પથરાતી જાય...
કે દીકરી મારી...
કે દીકરી મારી આછેરું મલકાતી જાય.....
હર્ષિદા દીપક
