એક કાગળ હરિ! તને મનાવવા લખું છું.
એવું નથી કે કોઈ માંગણી પૂરી કરાવવા લખું છું.
જંગ છે આ જિંદગી તો હું પણ એક યોધ્ધા છું.
અર્જુનના કૃષ્ણની જેમ સારથી બનાવવા લખું છું.
હશે કર્મ જો દડો તો આવશે જ મુજ તરફ,
જેવો છું તારો જ છું, એમ જતાવવા લખું છું.
આવી શકે તો આવજે જીવનમાં કોઈ વેળાએ,
તારી સાથે થોડો સમય અહીં વિતાવવા લખું છું.
વાંચતા છલકે જો આંખ તારી તો સમજજે,
પોકાર છે દિલથી, તને બોલાવવા લખું છું!
- અંકિતા સોની
